سابق ڈی جی آئی ایس آئی جنرل اسددرانی کااعترافی بیان اورحلف نامہ

نوازشریف پہلی بار سال1990ء میں فوج کی مدد سے اسلامی جمہوری اتحاد کے پلیٹ فارم سے وزیراعظم بنے تھے۔ فوج نے مبینہ طور پر’اسلامی جمہوری اتحاد‘ کے سیاست دانوں میں کروڑ وں روپے بانٹ کر انہیں الیکشن جتوایا تھا۔نوازشریف کا نام بھی ان سیاست دانوں میں شامل ہے، جنہوں نے مبینہ طور پر آئی ایس آئی سے پیسے لیکر الیکشن لڑا تھا۔

اسلامی جمہوری اتحاد کے سیاست دانوں میں پیسے اس وقت کے ڈی جی آئی ایس آئی جنرل اسد درانی نے تقسیم کئے تھے۔اس حوالے سے جنرل اسددرانی ایک حلف نامہ کی صورت میں سیاست دانوں میں پیسے تقسیم کرنے کا اعتراف کر چکے ہیں۔

سابق ڈی جی آئی ایس آئی جنرل ریٹائرڈ اسددرانی نے سال1994ء میں حلف نامہ دیا تھا۔اس حلف نامہ میں انہوں نے سیاست دانوں میں پیسے بانٹنے کا اعتراف کیا تھا۔جنرل ریٹائرڈ اسددرانی کا وہ حلف نامہ اصغر خان کیس کی بنیاد بنا تھا۔جنرل ریٹائرڈ اسددرانی کا انکشافات اور اعترافات سے بھرپور یہ حلف نامہ سپریم کورٹ کے اصغر خان کیس کے2012ء میں جاری شدہ فیصلہ میں شامل ہے۔

جنرل ریٹارڈ اسد درانی کے اس بیانِ حلفی کے مندرجات کچھ یوں ہیں:۔

حلف نامہ

میں،لیفٹیننٹ جنرل ریٹائرڈ اسددرانی،بالغ، مسلمان،جو کہ اس وقت بون جرمنی میں پاکستان کی سفیر کی حیثیت سے تعینات ہوں،حلف دیتا ہوں اور حلفیہ تصدیق کرتا ہوں کہ:۔

ایک۔ ستمبر1990ء میں بطور ڈی جی آئی ایس آئی،مجھے اس وقت کے چیف آف آرمی اسٹاف جنرل مرزا اسلم بیگ (جو کہ اب ریٹائرڈ ہیں) کی جانب سے ہدایات ملیں کہ اسلامی جمہوری اتحاد(آئی جے آئی) کی انتخابی مہم کیلئے کراچی کے چند بزنس مینوں کی جانب سے دئے گئے عطیات کی تقسیم کیلئے ”لاجسٹک اسپورٹ“ فراہم کروں۔مجھے بتایا گیا کہ اس آپریشن کو حکومت کی سپورٹ حاصل ہے۔

دو۔ ان ہدایات کے مطابق میں نے چند افسران کو ٹاسک سونپے اور درج ذیل اقدامات اٹھائے۔

اے۔ کراچی،کوئٹہ اور راولپنڈی میں چند”کور اکاؤنٹس کھولے۔

بی۔ یونس حبیب کی جانب سے کراچی کے اکاؤنٹس میں 14کروڑ روپے کی رقم جمع کرائی گئی

سی۔ ضرورت کے مطابق رقوم کو کوئٹہ اور راولپنڈی کے اکاؤنٹس میں منتقل کیا گیا

ڈی۔ آرمی چیف کے حکم پر یا پھر اس وقت ایوانِ صدر میں کام کرنیوالے والے الیکشن سیل کی جانب سے براہِ راست چھ کروڑ روپے تقسیم کئے گئے

ای۔ بقایا رقم کو ایک اسپیشل فنڈ میں منتقل کر دیا گیا۔

چھ کروڑ روپے کی تقسیم کو منسلک کر دیا گیا ہے۔

لیفٹیننٹ جنرل ریٹائرڈ اسددرانی
چوبیس جولائی1994ء

لیفٹیننٹ جنرل ریٹائرڈ اسد درانی نے اپنے 24جولائی1994ء کے اس حلف نامہ میں بتایا تھا کہ درج ذیل سیاست دانوں اور سیاسی جماعتوں میں اس حساب سے پیسے تقسیم کئے گئے تھے۔

این ڈبلیو ایف پی(موجودہ کے پی کے)

میر افضل۔۔۔۔۔۔ایک کروڑ روپے

یہ بھی پڑھیں: اصغر خان کیس فیصلہ میں سپریم کورٹ نے کیالکھاتھا؟

پنجاب
نوازشریف۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔35لاکھ روپے
عابدہ حسین۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔10لاکھ روپے
لیفٹیننٹ جنرل ریٹائرڈ رفاقت کو میڈیا کیلئے دی گئی رقم۔۔۔۔۔۔56لاکھ روپے
جماعتِ اسلامی۔۔۔۔۔۔۔۔۔۔۔۔۔۔۔۔۔۔۔۔۔۔۔۔50لاکھ روپے
الطاف حسین قریشی اور مصطفی صادق۔۔۔۔۔۔۔۔۔۔۔۔۔۔5لاکھ روپے
دیگر سیاست دان اور چھوٹے گروپ۔۔۔۔۔۔۔۔۔۔۔۔۔۔33لاکھ روپے

سندھ
جتوئی۔۔۔۔۔۔۔۔۔۔۔۔۔۔۔۔۔50لاکھ روپے
جام صادق۔۔۔۔۔۔۔۔۔۔۔۔۔۔50لاکھ روپے
جونیجو۔۔۔۔۔۔۔۔۔۔۔۔۔۔۔۔25لاکھ روپے
پیرپگاڑا۔۔۔۔۔۔۔۔۔۔۔۔۔۔۔20لاکھ روپے
مولانا صلاح الدین۔۔۔۔۔۔۔۔۔تین لاکھ روپے
دیگرسیاست دان و چھوٹے گروپ۔۔۔54لاکھ روپے

یہ بھی پڑھیں: کیا مشرف نے بلیک میلنگ کیلئے سپریم کورٹ ججوں کی غیراخلاقی ویڈیوز بنوائی تھیں؟

بلوچستان
ہمایوں مری(بگٹی کے داماد)۔۔۔۔۔۔۔15لاکھ روپے
جمالی۔۔۔۔۔۔۔۔۔۔۔۔۔۔۔۔۔۔۔40لاکھ روپے
کاکڑ۔۔۔۔۔۔۔۔۔۔۔۔۔۔۔۔۔۔۔10لاکھ روپے
کے بلوچ۔۔۔۔۔۔۔۔۔۔۔۔۔۔۔۔۔5لاکھ روپے
جام یوسف۔۔۔۔۔۔۔۔۔۔۔۔۔۔۔ساڑھے 7لاکھ روپے
بزنجو۔۔۔۔۔۔۔۔۔۔۔۔۔۔۔۔۔۔5لاکھ روپے
ندیم مینگل۔۔۔۔۔۔۔۔۔۔۔۔۔۔۔10لاکھ روپے

گالف کورس کے ذریعے۔۔۔۔۔۔۔۔۔۔۔5لاکھ روپے
دیگراخراجات بشمول بینک چارجزوغیرہ۔۔۔۔۔11لاکھ روپے

لیفٹیننٹ جنرل ریٹائرڈ اسد درانی کا خط
لیفٹیننٹ جنرل ریٹائرڈ اسددرانی نے اس حلف نامہ سے قبل 7جون1994ء کو اس وقت کی وزیراعظم بینظیر بھٹو کو ایک خط لکھا تھا۔۔۔اس خط میں بھی انہوں نے اُن چند سیاست دانوں کے نام لئے تھے جنہیں 1990ء کے عام انتخابات جتوانے کیلئے انہوں نے پیسے دئے تھے۔۔۔اسددرانی کے اس خط میں جن سیاست دانوں کے نام لئے گئے تھے،انکی تفصیلات کچھ یوں ہیں:۔

کھر۔۔۔۔۔۔۔۔۔۔۔۔۔20لاکھ روپے
حفیظ پیرزادہ۔۔۔۔۔۔۔۔۔30لاکھ روپے
سرورچیمہ۔۔۔۔۔۔۔۔۔۔۔5لاکھ روپے
معراج خالد۔۔۔۔۔۔۔۔۔۔2لاکھ روپے

اس خط میں لیفٹیننٹ جنرل اسددرانی نے اعتراف کیا تھا کہ”اس آپریشن کو نہ صرف صدر کی حمایت اور نگران وزیراعظم کی بھرپور دلی شمولیت حاصل تھی بلکہ یہ فوج کی اعلیٰ کمان کے بھی علم میں تھا۔۔۔“